Оны эхний өдөр 4 хүүхэд мэндэллээ

Шинэ оны эхний өдөр Дорнод аймагт 4 хүүхэд мэндэллээ. 1 дүгээр сарын 1-ний 00:55 минутад 4 кг хүү мэндэлснээр энэ өдөр 2 охин, 2 хүү эсэн мэнд төрсөн байна. Харин өнөөдөр шөнийн 03 цагт ихэр охин мэндэлсэн гэж БОЭТ-ийн Төрөх тасгаас мэдээллээ.


Өнгөрсөн 2017 онд тус аймагт 1874 хүүхэд мэндэлсний 50.5 хувь нь хүү байжээ. Оны сүүлийн 14 хоног төрөх тасаг их ачаалалтай ажиллав. Тухайлбал, 12 дугаар сарын 28-нд 9 хүүхэд, 29-нд 11 хүүхэд мэндэлж, төрөхийн хэд хэдэн хүндрэл гарсныг эсэн мэнд төрүүлсэн байна. Дорнод аймгийн БОЭТ сүүлийн 5 жил эхийн эндэгдэлгүй, амжилттай ажиллаж байгаа төдийгүй 0-5 насны хүүхдийн эндэгдлийг бууруулаад байгаа юм.