2024 оны 11 дүгээр сарын 21-нд Бээжин хотноо “Дэлхийн өмнөд"-ийн орнуудын орчин үеийн хөгжлийн форум амжилттай зохион байгуулагдав. Форумын гол хуралдаанд ХКН-ын Төв хорооны Улс төрийн товчооны гишүүн, Төв хорооны Суртал ухуулах яамны сайд Ли Шүлэй оролцож, нээлтийн үг хэлсэн юм. Тэрээр хөгжиж буй орнуудын хөгжлийн асуудал өнөөгийн олон улсын дэг журам, дэлхийн эдийн засгийн ирээдүйд нөлөөлөх гол хүчин зүйл гэдгийг онцлон тэмдэглэж, Хятад улс "Дэлхийн өмнөд"-ийн орнуудтай хамтран орчин үеийн хөгжлийн үйл явцыг тууштай дэмжих болно гэв.
Форумд оролцсон гадаад, дотоодын зочид орчин үеийн хөгжлийн асуудал өнөөгийн дэлхийн хөгжлийн гол чиг хандлага болсныг тэмдэглээд, "Дэлхийн өмнөд"-ийн орнууд өөрсдийн үндэсний онцлогт тулгуурлан хөгжлийн шинэ загвар, шинэ замналыг эрэлхийлж буйг хэллээ. Хятад улсын дарга Ши Жиньпин Хятад улс бол "Дэлхийн өмнөд"-ийн орнуудын салшгүй хэсэг төдийгүй хөгжиж буй орнуудтай хамтдаа орчин үеийн хөгжлийг урагшлуулахад бэлэн гэдгийг олонтаа илэрхийлж ирсэн. Мөн саяхан болсон ХКН-ын 20-р сонгуулийн Төв хорооны дөрөвдүгээр бүгд хуралдаанаар Хятадын ирэх таван жилийн орчин үеийн хөгжлийн төлөвлөгөөг баталсан нь дэлхийн олон улс оронд, ялангуяа "Дэлхийн өмнөд"-ийн бүсэд шинэ хөгжлийн боломжуудыг бий болгох юм гэж форумын оролцогчид үзэж байна.
Форумын хэлэлцүүлгийн үеэр зочид Хятадын орчин үеийн хөгжлийн загвар нь дэлхийн хөгжлийн онол, практикт шинэ хувь нэмэр оруулж, хөгжиж буй орнуудад өөрийн хөгжлийн замыг сонгох шинэ боломж, шинэ туршлага өгсөн гэж тэмдэглэв. Тэдний хэлснээр орчин үеийн хөгжил бол хүн төрөлхтний нийтлэг зорилт учир "Дэлхийн өмнөд"-ийн орнууд нээлттэй хамтын ажиллагааг тууштай баримталж, жинхэнэ олон талт үзлийг хэрэгжүүлэн, соёл иргэншлийн солилцоог өргөжүүлж, хамтын ажиллагааны шинэ орон зайг бий болгох шаардлагатай байна. Мөн олон улсын эрдэм шинжилгээний хамтын ажиллагааг нэмэгдүүлж, "Дэлхийн өмнөд"-ийн орнуудад түшиглэсэн, "Дэлхийн өмнөд"-ийн орнуудад үйлчлэх мэдлэгийн шинэ тогтолцоог бүрдүүлэх нь чухал гэдгийг онцоллоо.
Хятадын Төрийн зөвлөлийн Хэвлэл мэдээллийн алба, ХКН-ын Төв хорооны Намын сургууль, Хятадын Нийгмийн шинжлэх ухааны академи болон Бээжингийн их сургууль хамтран зохион байгуулсан энэхүү форумын үеэр “Дэлхийн орчин үеийн хөгжлийн тайлан”, “Хятадын орчин үеийн хөгжлийн тайлан”-г нийтэд танилцуулж, “Дэлхийн хөгжлийн судалгаа ба практикийн шагнал” гардуулсан байна. Мөн форумаар "Дэлхийн өмнөд"-ийн орнуудын орчин үеийн хөгжлийг судлах олон улсын эрдэм шинжилгээний шинэ сүлжээг байгуулснаар хөгжлийн онол, практикийн салбарт хамтын ажиллагааны шинэ шат нээгдлээ.
Эх сурвалж：https://mongol.cri.cn, Хөлөнбуйр хотын Хам зуучлуурын төвийн Содбилэг, Бүрэнбаяр, Гялбаа, Цэнгэл
DORNODMEDIA.MN