Шинэхээн шатрын жиргээ холбоо саяхан онлайнаар шатрын тэмцээн зохион байгууллаа. Цар тахлын нөхцөл байдлаас шалтгаалан олноороо цугларч чадахгүй байгаа энэ цаг үед Шинэхээн нутгийн Батжаргал, Баясгалан, Начин нар “Шинэхээн“ цомын тэмцээнийг зохион байгуулах санаачилгыг гаргасан юм. Уралдаанд Шинжиань, Шилийн гол аймаг, Туньлёо хот, Улаанхад хот, Хөлөнбуйр хотын хошуу, хот тойргийн 90 шахам тамирчин оролцож, хоёр өдрийн турш оюун ухаанаа сорив. Есөн ээлжээр нүүж тоглосон онлайн тэмцээнд Эвэнки хошууны Шинэхээн нутгийн залуу шатарчин Хаванжав түрүүлж, Шилийн гол аймгийн Баруун үзэмчин хошууны Отгонбаяр удаалж, Шинэ барга зүүн хошууны Шархүү, Тунлёо хотын Дэлгэрбаяр нар гурав, дөрөвдүгээр байрт шалгарлаа. Шилийн гол аймгийн Баруун үзэмчин хошууны Алтангэрэл, Шилийн гол аймгийн Сүнэд баруун хошууны Сэчиндэлгэр, Шинэ барга баруун хошууны Бүргэд, Эвэнки хошууны Ганга нар шагналт байранд оржээ. Энэ удаагийн тэмцээнд нутгийн 15 шатарчин дэмжлэг үзүүлж, дээд арван зургаан шатарчдыг шагнаж урамшуулсаны гадна, Шинэхээн баруун сумны Холбоо гацааны Даваа, Шинэхээн баруун сумны Баянхошуу гацааны Хишигт, Шинэхээн баруун сумны Батжаргал, Шинэхээн баруун сумны Шивээ гацааны Дашбалдан нарын ахмад шатарчдыг монгол шатрын өв соёлоо өвлүүлэн уламжлан авч яваа гавьяаг нь үнэлж шагнал гардуулсан байна.
Хөлөнбуйр өдрийн сонин, ШББХ Шиү Гуань, Шаов Тан, Танаа, Цэнгэл
DORNODMEDIA.MN