БНХАУ-аас Монгол Улсад суугаа Онц бөгөөд Бүрэн эрхт Элчин сайд Цай Вэньруй
Энэ оны 07 дугаар сарын 01-нд Хятадын Коммунист Нам үүсэн байгуулагдсаны 100 жилийн ойн нээлт ёслол төгөлдөр боллоо. ХКН бол БНХАУ-ын засгийн эрх баригч нам, БНХАУ-ыг удирдах гол цөм улс төрийн хүчний хувьд ХНК-ыг сайн ойлгож байж Хятад улсыг илүү таньж мэдэх болно. Энэ завшааныг ашиглан Монгол улсын анд нөхдөдөө ХКН-ын түүхэн замналаас товчхон дурдахыг хүсэж байна. ХКН нь улс орон харийн түрэмгийлэлд өртөж ард түмэн асар хүнд бэрхшээлд унаж тэсвэрлэх аргагүй цаг мөчид үүсэн байгуулагдаж энэ үеэс эхлэн Хятадын ард түмэнд аз жаргалтай амьдрал авчрах, Хятадын үндэстнүүдийн сэргэн мандуулах үүрэг хариуцлагыг хүлээсэн юм. ХКН байгуулагдахаас өмнө болон хожид Хятад улс хоёр гурван зуу гаруй улс төрийн намтай байсан хэдий ч зөвхөн ХКН Хятадын ард түмнийг манлайлан 28 жил халуун цусаа урсган тэмцэж Японы империалистуудыг ялж, Гоминданы эзэрхэг засаглалыг түлхэн унагаж ард түмэн өөрсдөө төр улсдаа эзэн суусан Бүгд найрамдах улсыг байгуулсан юм. ХКН нь шинэ Хятад улсыг удирдан өөрсдийн социалист хөгжлийн замаар замнаж социализмын үндсэн тогтолцоог батжуулан хамгийн анхны нисэх онгоц, анхны автомашиныг үйлдвэрлэж, анхны хиймэл дагуулаа хөөргөж, хэдэн зуун сая хүний амьдралын суурь хэрэглээг хангах асуудлыг шийдвэрлэж 20 гаруй жилийн уйгагүй хөдөлмөрийн үр дүнд бие даасан харьцангуй иж бүрэн аж үйлдвэрийн тогтолцоо, улс ардын эдийн засгийн тогтолцоог анхнаас нь цогцлоон байгуулж ирсэн. ХКН нь социализмыг байгуулах явцдаа 10 жил үргэлжилсэн “Соёлын их хувьсгал” зэрэг алдааг ч гаргаж байсан. Үүссэн асуудалтай нүүр тулж аливаа алдаатай зүйлд гүнзгий дүгнэлт хийж үзэл санаагаа ямагт шинэчилж, асуудалд ажил хэрэгч бодитойгоор хандаж ирсэн төдийгүй 1978 онд хуралдсан ХКН-ын 11 дэх удаагийн Төв Хорооны III бүгд хурлаар намын ажлын гол цөмийг эдийн засгийн бүтээн байгуулалтад шилжүүлж өөрчлөлт шинэчлэлт, нээлттэй бодлогыг хэрэгжүүлэн Хятадын онцлогтой социализмыг амжилттайгаар байгуулсан юм. Өөрчлөлт шинэчлэлт, нээлттэй бодлого хэрэгжсэнээр Хятадын эдийн засаг хурдтайгаар өсөн нэмэгдэж улс орны бүх талын бодит хүч, ард түмний амьдралын түвшин богино хугацаанд дээшилж чадлаа. 2010 он гэхэд БНХАУ-ын дотоодын нийт бүтээгдэхүүний хэмжээ дэлхийд II байранд орж “Дэлхийн үйлдвэрлэгч орон” “Дэлхийн хамгийн том экспортлогч улс” болсон байна. 2012 онд хуралдсан ХКН-ын XVIII Их хурлаас хойш Ши Жиньпинээр төв болгосон Намын Төв Хороо төр улсыг засах цогц шинэ үзэл санаа шинэ чиглэлийг дэвшүүлж Ши Жиньпиний шинэ эрин үеийн Хятадын онцлогтой социализмын үзэл санааг бүрдүүлэн Хятадын онцлогтой социализм шинэ эрин үед урагшлан орсон. Хятад улс 2020 онд чинээлэг нийгмийг иж бүрнээр цогцлоон байгуулж, цаашдаа 2035 онд социалист орчин үеийн улс, 2050 онд чинээлэг, ардчилсан, соёл иргэншсэн, эв найрсаг, социалист орчин үеийн хүчирхэг улс болох шинэ хөгжлийн замын зураг, зорилтыг дэвшүүлжээ. Ши Жиньпиний шинэ эрин үеийн социализмын үзэл санааны удирдлагаар БНХАУ-ын эдийн засгийн хүч шинэ шатанд дэвшин гарч 2020 оны эдийн засгийн нийт хэмжээ 100 их наяд юанийг давж дэлхийн эдийн засагт эзлэх харьцаа 17% орчим болоод байна. Хятад улсын шинжлэх ухаан технологи, инновацын хүчин чадал тасралтгүй үсрэн хөгжиж, сансрын уудмыг ашиглах, сарны судалгаа хийх, 5G технологи зэрэг маш олон үлгэр жишээ болохуйц үр дүнгүүд гарч байна. Хятад улсын хүрээлэн буй орчныг хамгаалах, үзэсгэлэнт Хятад улсыг байгуулах ажил тасралтгүй урагшлан “Хөх уулс, хөхөмдөг гол мөрөн нь бидний алтан мөнгөн уул” гэсэн үзэл ард түмний сэтгэл зүрхэнд улам хоногшин байна. Хятадын ард түмний амьдралын түвшин мэдэгдэхүйц дээшилж ядуурлаас ангижруулах тууштай тэмцэл, үнэмлэхүй ядуурлыг устгахад түүхэн шинжтэй ялалт байгуулав. Шинэ хэлбэрийн коронавирусийн цар тахал дэгдсэнээс хойш ХКН ард түмнийхээ амь насыг нэгдүгээрт тавьж, тогтолцооны болон удирдлагын давуу талаа ашиглан улсын өнцөг булан бүр дэх эвлэлдэн нэгдсэн ард олныг нэгэн чигт удирдан цар тахлаас хамгаалах тэмцэлд маш том ялалтыг байгуулсан. Хятад улс нь дэлхийн голлох эдийн засгийн хувьд эдийн засгийн өсөлтөөр тэргүүлж байна.
ХКН бол зөвхөн Хятадын ард түмэнд аз жаргалыг авч ирэгч нам төдийгүй, мөн хүн төрөлхтний дэвшилтэт үйл хэргийн төлөө тэмцдэг нам юм. ХКН бие даасан энхтайванч гадаад бодлогыг тууштай баримталж, хөгжиж буй улс орнуудын эрх ашгийг сахин хамгаалж, улс орнуудыг том жижиг, хүчирхэг буурай, баян ядуу гэж үл ялган эрх тэгшээр хандах бодлогыг баримталдаг. Шинэ Хятад улс байгуулагдсанаас хойш идэвхтэй санаачлан тууштай хэрэгжүүлж ирсэн энхтайвнаар зэрэгцэн орших таван зарчим, энхтайван, хөгжил, хамтын ажиллагаа, хамтаар хөгжих үзэл санаа болон ХКН-ын Төв Хорооны Ерөнхий нарийн бичгийн дарга Ши Жиньпиний дэвшүүлсэн хүн төрөлхтний хувь заяаны хамтын нэгдлийг цогцлоон бүтээх, шинэ хэлбэрийн олон улсын харилцааг бэхжүүлэх, “Бүс ба зам”-ыг хамтаар байгуулах зэрэг санаачилга нь дэлхийн энхтайвныг бэхжүүлж хөгжлийг дэмжих, олон улсын дэглэмийг сахин хамгаалахад асар том хувь нэмрээ оруулсан юм. ХКН болон Хятадын ард түмэн урт хугацааны турш хөгжиж буй улс орнуудад их хэмжээний буцалтгүй тусламж хөнгөлөлттэй зээлийг олгож, тэдний эдийн засаг нийгмийн хөгжил, ард иргэдийн амьдралыг сайжруулахад тусалсаар ирсэн. Шинэ хэлбэрийн коронавирусийн цар тахал дэгдсэнээс хойш БНХАУ хүн төрөлхтний хувь заяаны хамтын нэгдлийн үзлийг хэрэгжүүлж, олон улсын цар тахалтай тэмцэх хамтын ажиллагааг идэвхтэй өрнүүлэн 150 гаруй улс орон, Олон улсын 13 байгууллагад цар тахалтай тэмцэхэд нь эд материалын тусламж үзүүлэн 88 улс орон Олон улсын 4 байгууллагад вакцины тусламж олгож, 50 гаруй улс оронд вакцин экспортолж, том гүрний үүрэг хариуцлагаа үргэлж ухамсарласаар ирлээ. ХКН анх байгуулагдах үедээ 50 гаруй гишүүнтэй байсан бол эдүгээ 100 жилийн хугацаанд 95 сая гаруй гишүүнтэй, дэлхийн хамгийн том нам болон өргөжиж урт хугацааны туршид ямагт ард иргэдийн чин сэтгэлийн дэмжлэгийг хүлээсээр ирсэн. Үүнд ХКН-ын зөв бодлого, түүчээлэгч үзэл санаа гол үүрэг гүйцэтгэж үргэлж амжилтанд хүргэж байна. ХКН-ын гол туршлагаас хуваалцахад Нэгдүгээрт, үндэстнээ, ард түмнээ гэсэн анхны үүрэг зорилгодоо хэзээд үнэнч, үүнийхээ төлөө бүхнээ зориулахад бэлэн байдаг. ХКН үндэстнийхээ сэргэн мандалтын төлөө мянга түмэн бэрхшээл зовлонг амсаж, амь насны аюул заналхийлэл, бартаат урт аяны өмнө хэзээ ч ухарч байгаагүй. Олон сая ХКН-ын гишүүн хувьсгалын үйл хэрэг, улс орны ирээдүйн төлөө халуун амиа өргөсөн юм. Энхтайван цаг ирсэн ч ХКН-ын гишүүд улс орон ард иргэдийн нэн хүнд цаг үед амь биеэ үл хайхран үер усны гамшиг, цар тахал, ядууст туслах дэмжих зэрэг асар том үүрэг хариуцлагыг хүлээж тэргүүн фронтод дайчлагдан зүтгэж ирэв. Хоёрдугаарт, шинжлэх ухаанч онолыг удирдлага болгон, марксизмын үндсэн онолыг Хятадын бодит байдалтай нягт уялдуулан өөрийн улсын бодит байдалд бүрэн нийцсэн Хятадын онцлогтой социализмын замаар гуйвалтгүй урагшилж байна. Гуравдугаарт, намын сахилга батыг тууштай чангатгаж намын улс төр, үзэл санаа, зохион байгуулалт, ажлын арга хэлбэр, хяналт шалгалт, авилгал ялзралтай тэмцэх ажлыг бүх талаар чамбайруулж байна. ХКН асуудалтай зоригтой нүүр тулж, төрийн эрхийг барих явцад тулгарч байгаа үзэл санаа сулрах, чадвар хүчгүйдэх, олон түмнээс тасрах, авилгалд идэгдэх зэрэг аюулаас ямагт өндөр түвшинд сэргийлж, өөрийгөө тууштай цэвэрлэж, сайжруулж, төрийг жолоодох хүч чадамжаа тасралтгүй дээшлүүлж ирсэн. Дараагийн 100 жилд ХКН зохион байгуулалтаа улам чадавхжуулж шинэ гэрэлт ирээдүйг цогцлоох болно гэдэгт бүрэн итгэлтэй байна. Хятад, Монгол хоёр улс нь уул усаараа холбогдсон сайн хөрш, сайн анд нөхөд, сайн түншүүд билээ. ХКН нь Монгол улсын голлох улс төрийн намуудтай найрамдалт хамтын ажиллагаа харилцаагаа хөгжүүлж, хоёр улсын харилцааны хөгжлийг урагшлуулахад идэвхийлэн оролцдог юм. ХКН Монголын талтай намын байгуулалт, улсын засаглалын туршлагаа харилцан солилцож, харилцан итгэлцэл, ойлголцлоо нэмэгдүүлж, бүх хүрээний ажил хэрэгч хамтын ажиллагаагаа өргөжүүлэхэд бэлэн байна. Хоёр талын хамтын хүчин чармайлтаар Хятад Монгол хоёр орон цэцэглэн хөгжиж, харилцаа хамтын ажиллагаа тасралтгүй өргөжин шинэ шатанд хүрч, хоёр орны иж бүрэн стратегийн түншлэлийн харилцаа илүү их хөгжил дэвшлийг угтан авч хамтаараа илүү үзэсгэлэнт төгөлдөр эх дэлхийг цогцлоон байгуулах үйлсэд үнэтэй хувь нэмрээ оруулна гэдэгт итгэж байна.
Ирэлт: http://www.solongonews.mn , ШББХ Шиү Гуань, Шаов Тан, Танаа, Цэнгэл
DORNODMEDIA.MN