ШИНЭ БАРГА БАРУУН ХОШУУНЫ БОГД-УУЛ СУМЫН НААДАМ БОЛЛОО

Долдугаар сарын 14,15-ны өдрүүдэд Шинэ барга баруун хошууны Богд-Уул сумын наадам боллоо. Баян наадмыг Богд-Уул сумын Намын хороо Засгийн газар, гацаа, тойргоос зохион байгуулж хол ойрын уяачид, харваачид, бөхчүүд, малчид болон жуулчид цугласан сайхан найр боллоо. Хурсан олон эрийн гурван наадмаас гадна сээр таших, олс татах, шатар нүүх, түүдэг галын үдэшлэг зэргээр хөгжилдөн цагийг зугаатай өнгөрөөж байв. Баяр наадмын хурдан морины уралдаанд их насанд 40 морь уралдаж, ШББХ-ны Буйр сумын Сэргэлэнгийн хүрэн морь түрүүлж, ШБЗХ-ны Бадрахын хээр морь аман хүзүүдлээ. Хязаалан насны уралдаанд ШББХ-ны Намжилын халтар хязаалан түрүүлж, ШББХ-ны Сайжирхын хүрэн хязаалан аман хүзүүнд хурдалжээ. Сурын харваан тэмцээнийг эвэр нум, болд нумын харваа хэмээн ангилан явуулснаас ШББХ-ны Доржравдан, түрүүлж, Хуучин барга хошууны Алдарту дээдэлж, эвэр нумын харваанд ШБЗХ-ны Эрхэмбаатар түрүүлж, Эвэнкийн Сэдэнбямба дэд байрт шалгарлаа. Хүчит бөхийн барилдаанд 128 бөх барилдаж, ШББХ-ны Богдуул сумын Энэрэлбат түрүүлж, ШБЗХ-ны Шинэ булаг сумын Энхжаргал үзүүрлэж, ШББХ-ны Буйр сумын Буяндүүрэн, ШББХ-ны Далай сумын Нээгч нар шөвгийн дөрөвт үлдсэн байна. Эмэгтэй бөхийн барилдаанд ШББХ-ны Сарангэрэл түрүүлж, ШБЗХ-ны Дарихжав үзүүрлэж, ШББХ-ны Урьхан, ШБЗХ-ны Шүр нар шөвгөрсөн бол, хүүхдийн бөхд Туульс түрүүлж, Цогбилэг үзүүрлэж , Омогшил, Эзэн нар шөвгийн дөрөвт хүч баяраа үзлээ. Сээр таших уралдаанд ШББХ-ны Хэрлэн сумын Буянт түрүүлж, ШББХ-ны Шинжлэх-ухаанч дэд байранд шалгарав. Монгол шатрын уралдаанд ШББХ-ны Хэрлэн сумын Б. Бүргэд түрүүлж, ШББХ-ны Хэрлэн сумын Дорж , ШББХ-ны Нэгдүгээр дунд сургуулийн сурагч Буянжаргал, ШББХ-ны Алтан-Эмээл балгасын Төмөрбаатар нар удааллаа. Баяр наадмын өдрүүдэд бороо тэгширч, нутаг нуга сэргэж цаг агаар тааламжтай сайхан байсанд малчин түмний ч сэтгэл тэнүүн байв.                                                                                         
                                            Хөлөнбуйрын өдрийн сонин Хуньмэй, Хасбагана, Цэнгэл, Урьхан