ХӨЛӨНБУЙР СУМ СҮҮ БОЛОВСРУУЛАХ ЦЕХТЭЙ БОЛЛОО

Хөлөнбуйр суманд НҮБ-ын Хүнс хөдөө аж ахуйн байгууллагын санхүүжилтээр “Сүү цагаан идээ боловсруулах цех” нээлтээ хийлээ. Тус цех нь хоногт 1 тонн хүртэлх сүү боловсруулж, бүтээгдэхүүн үйлдвэрлэх хүчин чадалтай юм.

Европын холбооны санхүүжилтээр НҮБ-ын Хүнс Хөдөө Аж Ахуйн байгууллага, Монгол улсын Засгийн Газраас хэрэгжүүлж буй ажлын байр нэмэгдүүлэх зорилготой “Хувийн хэвшлийн оролцоотойгоор мал аж ахуйн гаралтай бүтээгдэхүүн болон хүнсний ногооны үйлдвэрлэлийн нэмүү өртгийн сүлжээг хөгжүүлэх” төсөл манай аймагт ийн хэрэгжиж эхэллээ. Төслийн хүрээнд сүү боловсруулах цех ажиллуулах боловсон хүчин бэлтгэхээр тус суманд “Сүүн цацал” хоршоо байгуулж, тус хоршоо одоогоор 10 гаруй гишүүнтэйгээр үйл ажиллагаагаа эхлүүлээд байна. Хоршооны гишүүд төслийн сургалтад хамрагдаж 14-15 нэр төрлийн бүтээгдэхүүн хийх аргыг сурчээ. Сүү боловсруулах цех бүрэн хүчин чадлаараа үр ашигтай ажиллавал алсдаа 100 гаруй хүн ажлын байраар хангагдах юм.


Хөлөнбуйр сум нь Зүүн гурван аймгийн уулзвар мянганы зам дагуу байршилтай учир нутгийн брэнд бүтээгдэхүүн үйлдвэрлэх, борлуулах таатай нөхцөл бүрдэж байна гэж НҮБ-ын ХХААБ үзэж байна. Мөн тус сум 160 мянга гаруй малтайгаас 10-аад мянга нь үхэр болохоор гол түүхий эд болох сүүг сумаасаа авснаар малчдын амьжиргааг дэмжих боломжтой юм. Төслийн зорилго нь мах сүү, ноос ноолуур, арьс шир, хүнсний ногооны нэмүү өртгийн сүлжээнд өрсөлдөх чадварыг сайжруулж, ногоон хөгжлийг дэмжих замаар зохистой хөдөлмөр эрхлэлтийг бий болгоход оршиж байгаа аж.