Томуугийн эсрэг дархлаажуулалтад 4 мянга гаруй хүн хамрагджээ

Томуу, томуу төст өвчин амбулаторийн нийт үзлэгийн 15.6 хувьд хүрч, өвчлөл өндөр байгаатай холбогдуулан Чойбалсан хотын хэмжээнд цэцэрлэгүүдийг түр хаагаад байгаа. Тэгвэл, томуугийн өвчлөлөөс урьдчилан сэргийлэх зорилгоор 4 мянга гаруй хүнийг дархлаажуулалтад хамруулжээ. Тухайлбал, мянга гаруй эрүүл мэндийн ажилтан, 600 гаруй жирэмсэн ээж, 828 архаг хууч өвчтөн, 900 орчим өндөр настныг дархлаажуулж, сайн дурын дархлаажуулалтад 700 хүүхэд, 580 зэвсэгт хүчнийхнийг хамруулаад байгаа юм.

Өчигдрийн байдлаар, тус аймгийн амбулаторт 9 мянга гаруй хүн үйлчлүүлсний 8.4 хувь нь томуу, томуу төст өвчнөөр оношлогдоод байна. Харин өнгөрсөн долоо хоногт томуугийн өвчлөл 7.2 хувиар буурсан гэж аймгийн ЭМГ-аас мэдээллээ.